機界星華 – 2 頁 – 相集, 影片, 評論

Xtransbot 博士

很久沒有入手 XT 社的產品，因為他們的產品總有大大小小不同的瑕疵，一直都被歸類為「二線三廠」。但近年 XT 似是很有鬥心，密集式發布MP比例新作，當中包括了今次介紹的博士，就即管看看他們的功力有否升？

最初睇上 XT 博士原因是外型十分討好，實物到手亦對版，非常接近 G1 動畫神韻，特別是幼身的顯微鏡管，相對於其他產品的「粗管」設計更勝一籌。頭形美觀，有多種不同表情，另加兩個 IDW 造形頭，可玩度是足夠的，唯一欠缺了 G1 玩具的口罩造型頭，否則會更完美。可動方面中規中矩，除基本關節外，也追加了彎腰、肩部的前彎蝴蝶關節等，可惜關節間有不少阻礙，膝關節幅度不足等影響了整體發揮，而金屬物料所增加的重量亦影響了身體平衡性，扣了不少分數。變形，始終是 XT 最弱一環，其實博士本身變形套路並不複雜，但 XT 往往追加很多繁瑣步驟，令整個變形麻煩難變，令人沮喪，卡扣效果差，大大損害穩定度，是整體最失望的地方。幸好 XT 博士追加了大量配件，主要環繞 S2第18集故事「Microbots」，令整體可玩度提升不少，3 個迷你博派出奇地可動，增加了不少趣味。

整體而言，3廠 Xtrans 力戰到今天仍有一種恨鐵不成鋼的感覺，其實整體是有進步的，例如今次博士無論人形或顯微鏡造形比例都十分優秀，物料比起以往亦進步不少，可惜核心的變形問題仍未有大突破，可惜可惜。

Transformers Legacy Black Zarak

黑撒克 – 一個字：正！

由 2013 年推出泰坦級大力士開始，去到今日，G1 年代嘅基地級變形金剛總算出齊，受惠於「守尾門」嘅關係，撒克巨蠍個模絕對係眾多巨人中最好嘅一個，來到改模而成嘅黑撒克，係一個非常完尾嘅總結！

身體相信唔洗多介紹，玩過撒克巨蠍嘅玩家都會知佢十分好扭，隨時可變出不同形態，黑撒克故事中嘅經典雙頭龍當然冇問題，而只要花D心思，亦可追加出裏基地/戰艦等模式，可玩度十分之高。

而黑撒克嘅修改，除顏色外，靈魂部份就係全新修訂嘅頭部，改得極有誠意，除左撒克在上次大戰留在心口嘅傷痕外，頭部變形同遮蓋罩都好好玩！

整體上，作為完夢產品，黑撒克係必入之作！fans苦等多年終於有一隻無論體積變形可動都完全合心意嘅巨人，仲有咩好投訴呢？😃😃😃

MP-53 Skids / MP-54 Reboost

一次過同模兩兄弟，可以話係 MP 重回 MP-12 系統之作。呢部 Honda City，簡單易變，基本上唔睇說明書都可以快速完成。留意，變形過程係「簡單」而唔係「簡化」，應有既佢都有，用最直接既方法完成。可動雖唔算超班但都好優秀，足夠把玩。其實 Skids 唔算G1故事內嘅主要角色，經常覺得可有可無，不過 Honda City 車型係有佢嘅魅力，不過Takara就諗縮數，得MP-54 跟電單車，攪到又要雙入😅😅

所以結論，兩兄弟算好玩，不過如果對角色冇特別要求，建議只買 MP-54 已足夠😃😃

Newage 馬格斯

由結論講起，佢係出得最好既小比例馬格斯，其他全部唔洗考慮！可放心買呢隻。

今次 NA 馬格斯，表現出核心白文外掛馬甲一個最合理最平衡嘅方案。首先拖頭白文部份，變形相當驚喜，好有自己嘅一套原創風格，而且過程容易暢順，反覆變形都得心應手。白文人形車形比例都好，可動亦無可挑剔，非常精緻。由車架變成嘅馬甲，簡單到位，唔會有散亂感覺，上半身以一個整體完成，下半身就變出裙甲同雙腿，安裝容易穩固。外加裝甲後，可能並冇太大嘅犧牲，仍然靈活。心口可連甲打開放入博派心臟，感覺十分討好。加上拖架後整部馬格斯車型都好理想，雖然因內窿比較狹窄未能放入大車，但考慮到整體比例係可以體諒。唯一挑剔係附送手形比較少，唔可以擺出太多動作。

整體上，NA馬格斯令人喜出望外，係小比例不二之選😃😃😃

任天堂 Switch Metroid Dread

メトロイドドレッド | Metroid Dread | 密特羅德生存恐懼

推出日期：2021年10月8日
類型：橫向動作

經典橫向動作迷宮遊戲再次回歸！好多人會介定呢種叫「月下」玩法，意思係遊戲類型近似「惡魔城月下夜想曲」。但其實呢種形式最早就係Metroid，因為紅白機的第一作已經係咁！事實上 Metroid 同月下係好唔同的，彼此風格存在好大差異。Metroid 神秘感非常之重，解迷要素高，迷宮版圖大都係佢既特色。

回說遊戲本身，作為一隻動作遊戲 Metroid 系列係永遠唔會令你失望。來到 Switch 平台，Metroid Dread 可以話係一隻完全成熟既作品，雖然新要素唔算好多，但無論畫面、操作、流程、整體流暢度比起以往都更上一層樓。2.5D 畫面華麗細緻，會因應故事發展穿梭於 2D 同 3D 之間，動作戰鬥同過場畫面二合為一，令Boss戰更見迫力同一氣呵成。操控方面，縱使主角薩姆斯攻擊組合非常之多，按鍵卻出奇地順手，熟練後可做出極多微調變化，而呢D微控對Boss戰同後期破解地圖迷宮都有關鍵作用。介面地圖顯示貼心又清晰，一D隱藏要素會在地圖以閃爍形式作為提示，清晰得黎並冇影響佢既難度，十分難得。呢種遊戲，解迷成份同遊戲流暢度往往相互影響，「太謎」會令你經常卡關失去動力，太流暢又會覺得難度太低，但Metroid Dread 明顯下左好多苦功達到好好既平衡，基本上好少走冤枉路既情況，但又唔會令你輕易通過。Boss 戰亦係系列重點之一，今集既Boss大多好有挑戰性，不易通過，但當你掌握左攻擊模式後，又會令你好有滿足感！新要素方面重點應該係 7 部對主角既狙擊兵器E.M.M.I.，佢地會在特定區域追蹤捕殺主角，而主角只有取得特定武器先可以擊敗佢，之前就只能走避，呢個設定幾刺激好玩，不過由於E.M.M.I.只能在特定區域活動，就係主角不幸被捉到都只係在閘口再開始，所以失敗代價同壓迫性就有點不足。

整體上，系列經過多代改進，Metroid Dread 可算係最成熟既「完全體」，可玩度非常高。用左近20小時完成遊戲，但中間用左好多時間開地圖同搵隱藏要素，相信一般人用9小時上下就可爆機，以動作遊戲而言算係有唔錯既長度。而game內有大量極有挑戰性既隱藏item有待發掘，要100%完成地圖，就會用多好多時間。誠意推介！😃

Fans Hobby – Micron 傳說柯柏文

我諗除左 FH，你都幾難搵到另一間3廠願意出呢種相對冷門既角色。Micron 傳說，又或者外國普遍認識既 Armada算係一部幾唔錯既動畫作品，而呢個宇宙既柯柏文同過往都有幾大分別，原版本既玩具仲要有一個非常破格既自動變形系統，一直都為人所津津樂道。

而今次 FH 主理，雖然冇左自動變形機能，換回的就係多變可動，一種現今MP化既設計標準。可惜玩具初出時飽受質量問題困擾，要待廠方補件解決問題先可以重新把玩。

回說玩具本身，各模式都係份量充足，玩法好多，細文比例討好，貨櫃亦可變成基地模式，充分發揮左同眾多 Micron 互動既特性。細文在兼顧大文既變形結構同時，沒有因此而犧牲，轉腰曲腰接地關節一應俱全。合體成超級模式後，比例亦非常討好，唔會好似之前既仁萊咁肥大，巨大既貨櫃變形後有佢應有既重量感但唔累贅，非常有霸氣！

整體上，其實市場上係冇選擇，因為就算官方自己相信有排都唔會排到佢，不過 FH 並冇因此而馬虎設計了事，睇得出係落足心機的。雖然初期受質量影響，但如果喜歡 Micron 傳說，呢個版本仍然係推介入手的。😃😃😃